موسوعة الشعر الحلمنــتـــيـشـــــــى

فقط لجمال الكلمه وصدق الفكره وعمق المضمون وحلاوة الالفاظ فى الشعر الحلمنتيشى ..

فكرت فى طرح هذا البوست ... وهو عباره عن تجميع لكثير من القصائد الحلمنتيشيه الجميله ..

التى اتمنى ان تنال وتستحوز على جزء من رضكم

كل الشكر وخالص التحايا الى هيئة حلمنتيش العليا

((الغنيّه عن التعريف ))

ونبدا مشوار الضحك والفرفشه مع اولى القصائد وهى بعنوان:

نـــــــــــــــــــــــــدى

قلتي ليّ سموك ندى!؟!

وده منو السمّاك ندى؟

ده أكيد أبوك

إنعل كِدة!

فيك شنو يسمّك ندى!؟

في صوتك أتخن مننا

إضنين كُبار زي دِشّنا

وتقولي ليّ سمّاك ندى!

خشمك ده ريحتو معفّنة

ايدين كبار حقات بُنى

وتقولي لي سمّاك ندى!؟

المشية كتّاحة وعلال

كرشك تقول شايل جَنى

وتقولي لي سمّاك ندى!؟

قالت لي "ها هدى في البطاقة إسمي ندى"

شوف يا أخ..

مافيش علاقة بينك وبين ندى

خلّيها ندى ..

خالت قريبة جارت صديقة ناس ندى

ما فيش علاقة

ندى في العيون أكحل مجعّد مسوّدة

انتي العيون فوقن قضى

ندى في الحواجب زي هلال

قصة نصوم دي مؤكدة!

انتي الحواجب دلجة بس

قلم الحواجب هاردها

وتقولي لي سمّاك ندى!؟

ندى تبتسم آلالاف مؤلفة تسعدها

وانتي الخشم شارّة التلاليش

بس طبق ومغطّي صينية الغدا

ندى في الوشيش نظرك بشيش..

ما يعقّدها

وانتي الوشيش وش الجحيش

نخرين كُبار كُرعين ردا

وتقولي سمّاك ندى!

قاتلي "آي أنا إسمي ندى"

شوفي أوعك تقولي اسمك ندى

ندى ما بس الاسم

ندى الجمال زايد الأدب زايد العلم زايد الفهم

ندى في الجمال ما شُفنا أجمل من كِده

ندى في الدلال خصّاها بيو رب العباد حين أوجدها

ندى في الأدب ..

ربّوها بيو رجال ياكلو النار مولّعة موقدة

ندى في الكلام

طبيعي صوتا بيجيب صدى

ندى في "البزاغ" ..

شربتي "سفن أب" ياهو ده !

وتقولي لي سمّاك ندى!

موضوع: ايكون ده شنو ؟؟؟ الجمعة مايو 20, 2011 5:55 am

ايكون ده شنو ؟؟؟

هو زى طالع
وما طالع
وزى واسع
وما واسع
وزي واقع
وما .. لا اظن واقع
إكون دا بنطلون شافع !!؟؟
إكون دا شنو؟؟
إكون لابساه بالمقلوب؟
إكون نص توب؟
هه يا المتخرجين يا دوب..!
إكون دا الروب؟
إكون دا شنو ..؟
كيف يا شاب
إكون شراب..؟
الشراب تحت ما فوق
إكون دا بنطلون مشنوق؟
حاجة عجيبة مالية السوق
إكون طاقية ممطوطة؟
إكون فوطة ...؟
غايتو عمل جنس جوطة!
إكون دا شنو...؟
إكون ماكسي ..؟
إكون عراقي بالعكسي؟
غايتو يا ناس جنس لبسه
تخلى الزول اموت هسي
إكون دا شنو..؟؟
ناس قالوا إكون فركه!
وناس قالوا
إكون باقيهو
واقع منو في السكه!!!
وواحد قال:
إكون سروال بدون تكه!!!
دي ما شبكه
إكون دا شنو؟؟؟
إكون دا بنطلون نص كم
إكون دا ردا وعندو جضم
إكون بى كم ؟؟
إكون دى بلوزة مجروره؟
إكون دي ملايه مفروره؟
ولا اكون لبس كوره!؟
دخلو موضه كندوره
دا برمودا .. دا برمودا
امانه وقعتك سودا
لبستي الليله برموادا؟؟
بكره تجينا بالشراب
وبرضو تقولي لي موضه

موضوع: دنيا غريبة الجمعة مايو 20, 2011 5:56 am

دنيا غريبة

ناس ضايقاها ماكنتوش
وناس دافساها صحنين بوش
ناس نادوها ناريمان نهى وإيمان
نزار هيثم أسامي رشوش
وناس نادوها يا كلتوم ويا فطوم
وود بعشوم أبو طربوش أسامي بروش
ناس في الحب بتدخل توش
بدون تقديم بدون تلميح معاها قروش
شبح موديل سنة ألفين بيملى الحوش
وناس بتريد بكاها يزيد وما بتوصل
دوام يدوها بالشاكوش
عشان تعبان مفلس تب ما عندو ماكنتوش
وتسمع لب لب لب
وراسو يدوش ويبقى عموش
يقولوا عليهو شهيد في الحب ومات مغشوش
وحالي البي أصبح كيف
ده من شفتك غشاني خريف
مطر من جسمي نازل شو
ويوم سيرتك يجيبوها
أبقى أخاف أكون رجاف
بدل رفدور أرش بف باف
قميصي الساوي لي غلبة
مسكتو لبستو بالقلبة
أدور أنضم أتمتم زين
أمرق الكلمة من علبة
واتلخبط
كراع جزمة واعين التانية ألقى شبط
وأكون ملخوم ..
أشوف سنير .. أقول برلوم
أمش شمبات .. أقول أم دوم
أشوف شندي .. أقول خرطوم
أقلب الحال .. ليلي سهر .. صباحي أنوم
واحلم يوم
تكوني معاي ونطلع في مكاناً هاي
تشربي كولا واقعد ساي
أتوه واسرح وانم دوباي
وا أسفاي وا أسفاي
على قلبي الصبح بكاي
وشن بنسوي لما نشوف قمر ضواي
يطلق النار يشع جواي
ويبقى مناي .. أعاين ليك صباح ومسا
واجر السبحة أقول مدحة
سراي سراي
مناي ألقاك يا السمحة
مناي تجودي بي عينيك قد لمحة
ولمن تلبسي الطرحة .. تصاب معدتنا بالقرحة
ويجربوا فينا كل علاج :
هستامين .. كلودكوين
دة لا ينفعنا إنتستين
ولا يشفينا دربكينين
وما عارفين إنو علاجنا كافلجين
وكافلجين علاج لكل مرض خطري
علاج للبشري والبطري
وأشوف قدري
أكان حبيت وشاع خبري
أكان كفت الهموم كفري
وقبل أموت .. أقول كلمات
أوصي بدفني في الأحفاد
ويبقى فراشي في شمبات

موضوع: الزمن الضائع الجمعة مايو 20, 2011 5:58 am

الزمن الضائع

متين يا الله ألم الفكه
أجيب الشيلة واسوي الشبكه
وأمي تزغرد بي طول صوتها
وأنا مبسوط وظابط الشكة
هدومي معطنة بالأرياح
ريحة الخمرة وريحة الدلكة
واطبع للعيزومة كروت
حاشاها الما زي كرت البنزين
جميله زاهية في ورق التوت
وتحت الإمضاء مشكورين
لأنها لحظة ما بتفوت
وإلا تكونوا مبسوطين
ويجوا الأولاد بوجوهاً نادية
يقشوا الفسحة الواسعة وهادية
نرًكب فيها الصيونات
ونعمل حفلة بود البادية
ولازمن حفلة تكون صباحي
أشفي غليلي وأداوي جراحي
من زمن العذابة الأغبر
السًود عيشتي وزاد لنواحي
أفك القيد من قلبي وأغني
حبيب الروح وغني يا صاحي
وفي العصرية نمرق سيرة
خلوق منتظمة ماشة مسيرة
زي صف دكانأً ناصية
فيه سجاير بالتسعيرة
بناتنا يغنن مبسوطات
دور بينا البلد ده
يلفن يدورن العربات
ولمن أصل بالسيف اتقدم
زي الفارس ماشي ملجم
وشي بينضح لمعه ونضرة
قميصي نضيف وماه مجلبط
بملاح خدره
أهز في البنوت بي سيفي
وابخبخ فيهن لبن البدرة
وفجأة يدق صوت الدلوكة
وتبقى الناس بالجد مربوكة
واحدة تصفق واحدة تزغرد
وواحدةتلوك في لبان بازوكة
جابوا عروسي وبدت الوقفة
سرحت بعيد في حق القفة
جابت قون بي رقة وخفة
ما اتجرست كلا وحاشا
الا هناك واقفين شماشة
قالوا اكيد شارب حرباشة
زعلت شديد وغلبني اللعب
لانو كلامن كلو كضب
قاموا اصحابي بصوت عالي
يا عبد الله اطلع بره إشاعة إشاعة
وحتماً يوم لي أمك عايد
قونها حقيقي ما اوف صايد
صوت أصحابي أثر فوقي
بحركة ذكية جبت القون
وانا والحلوة بقينا درون
وفجأة أضفت الهدف الثاني
وغمر الساحة فرح رباني
مرقوا اصحابي يكوركوا ويهتفوا
فاتوا الفسحة وسدوا الشارع
صوتهم طاغي ظاهر وطالع
يا عبد الله هايل ورايع
جبت القون في الزمن الضايع

موضوع: ولاد مايعين الجمعة مايو 20, 2011 5:59 am

ولاد مايعين
ولاد صايعين
قميص رقاش
وقاش حشاش
جسيم ناعم
ممسح ديمة بالفازلين
وحس مخفوض ولين ..لين
حناكيش والله .. ما ناقشين
بياكلوا الجبنه بالبيرجر
والمايونيز ملخبط فيهو حب التين
معلق جدول التسمين
ووكت ما يجوك ..متلمين
تقيف محتار..
تقول يا ناس
ديلا رجال..؟ ولا عوين.؟
هه يا الخيبه.. وكنت امل
معشش في قلوب اهلك
وزي المويه ليك راجيين
طلعت فشوش...
دهب مغشوش..
وما بتنفع..
لا بجنيه..لا طراده ..لا ملين!
منو القال ليك دروب العزه
كان ركبوها بالفيسبا
والبازوكه والفازلين..
منو القال ليك سيوف النصر
كانت عند ولاد لامعين؟
اكان فراسا ركبو الخيل
وصنعو العز
لبست الليله انت الجينز
ركبت البنز
تدور مكنه بالبنزين
وبعد دا ..خسرت الحرب
وجيت راجع مع الفاشلين
منو البسمع كلام مليان
لما يقول:
الشعب العربي وين؟
الغضب العربي وين؟
وين الملايين ؟؟؟
ملايين كان وجودا زمان
لكن صفر في دا الحين
ملايين كان صداها زمان
نعيق البوم فى دا الحين
ملايين كانو فوق في العرش
ووقعوا الليله جوه الطين
من المحيط وللخليج
ملايين كلهم فاشلين
فرد غنيه لي جاكسون
ملايين كلهم راقصين
فرد طلقه من صهيون
ملايين كلهم لابدين
ملايين والله ما نافعين
منو البيرجع التاريخ
لمن كانت اسبانيا
معقل وساحه للفاتحين
منو البيصحى عين جالوت؟؟
بعد ما مات صلاح الدين
منو البقطع رحط القدس؟؟
عروس بت عز
ويا داب في عمر عشرين
وبرضو تقول شباب عرب؟؟
اصح نقول شباب ضائع
مشتت وفي قيود و سجين
لكن يا ناس بقولو كلام
تعالوا ننضف افكارنا
نحارب الجور
نحارب الردة والأثام
نفكر في عروبتنا
نخطط نمشي لي قدام
وبعد اليوم فيا جوليا
ويا ام عزين .. ويا الهام
حلفنا نجدل العملاء
وكل صهيونى ابقى حطام
وتبقي العزه عربيه
تعانق في سمانا غمام

موضوع: يا طبيبة الجمعة مايو 20, 2011 6:00 am

يا طبيبة

يا اللي ريدك فيني طبعة .... يا المكسرة فيني ضلعة
يا البجيك في الجامعة دايش .... يوم خميس ألقاه جمعة

يوم أشوفك ... قلبي ينتف .... عرقي ينزف
وابقى اشوفك سبعة سبعة
" أصلو ريدك جاني فجأة " .... وأدى لي صنقوري كبعة

****
يا طبيبة ... يلا شيلي القرقريبة
ويلا عوسي قليبي كسرة
ويلا دنكلي منو لقمة .... والعبيبا

عل بس شيليها مرة .... وابلعيها كالجاتوه
خليهو يسأل جوة يسأل .... والبيسأل ما بتوه
ولما جات المعدة تهضم .... قيل مهلاً اتركوه
أنه لا يطلب شيئاً
إنه قلبُ ُ متيم .... جاء يسأل عن أخوه

*******
قد سألتك لا تجافي .... إنه حب خرافي
ما بسيبك .... كان بترضي وكان تخافي
ما بسيبك كان رضيتي وكان أبيتي
كان وقعتي .... وكان جريتي
كان عقب طلعتي زيتي

ما بسيبك .... كان خلطتي الأمة جملة
كان طلبتي المهر عملة
وإن طلقتي علي نملة

ما بفوتك إنت املي
كان بترضي وكان تملي
ما بفوتك إنت للي

إنتي أقري .... وكل معلومة بتفيدك
يا حلاوة المايكروبايو .... جاري في موية وريدك
كل جرثومة بتريدك .... صارو هيلك من عبيدك
وإنتي للباثولوجي تقري .... أصلو شيتاً دمو بقري
علة جنبك يبقى ساهل .... وفيهو تجري

******
وإنتي يا أشطر طبيبة .... يلا شرحي فيني حلي
فرتقي الجواي وسلي

تلقي روحي مناها ريدك
والعلاج جاهز في إيدك

ماهو كم كبسولة "فاليوم"
إسبرين أو كان يورانيوم

العلاج جاهز في إيدك من سنين
العلاج يا انتي آخذ حقنة حُب أو حبتين
من عيونك .... من كلامك .... كلو ريحة بنسلين
واشفى من كل المواجع .... وأبقى زين

موضوع: بووووووبي الجمعة مايو 20, 2011 6:02 am

بووووووبي

احيييييييييييينا!

أحي أنا ! ويا بختنا ! ويا حظّنا!

وأحي أنا!

قالوا في تعليمة في حيّنا

اتلمن أُمات عيون فيهن هَنا

وأُمات جضوم حديهن هِنا

سيقاناً زي القَنا ..

والله أخير حقاتي أنا!

ديل كمان منو الجابوم هِنا!؟

وبدت التعليمة ..

يا بِنيّة يلاّ .. فرفشي وما تختشي

"أدوك فلّة؟" نحمد الله

"أبوكي في؟" متوفّي!

"ماما في؟" ما بتقول شي!

"أخوك في؟" ده لي شنو، ما بسو شي!

وإظنّك كمان بتكفّتي!

"كلبكم في؟" ما بعضّي!

هو كيف يعضّي..

هو زاتو من عمايلك يا فلانة

عقلو منّو طشّ فرّ

بقى لا بفرز الجوّة جوّة ،

لا بعرف البرّ برّة

هو زاتو استغفر الله

وسط كلاب الحِلّة ليهو زِلّه

اتلمّوا ليو كلاب الحِلّّة

يا بوبي "هَو" بي الجنبة دي!

ويا بوبي "هَو" بي الجنبة دي!

واحنا بنقول يا بوبي لأ ، حبّة إختشي

لو إنت سِتّك ما بتختشي

إنت إختشي

يا بوبي "هَو" أهما شي

وا خسارة مجتمعنا

وا خسارتك يا قيمنا

والما بقول "بي الجنبة دي"

هم فقط فيهم أملنا

ويلاّ أكبر يا أملنا

ويلاّ فرهد يا أملنا

موضوع: الشطّة الجمعة مايو 20, 2011 6:05 am

الشطّة

حبيبتي I love you

ومن حبك I shall die

من شِدّة ما إنتِ beatiful

شعري الفي راسي fly

I see في عيونك sea

I can't swim براي

when I see you في الـ road

going to the shop بي جاي

cutting the زلط

on foot with shoes small and high

I don't know what I can do

I can't believe my eye

سماحتك عقّدتني عديل

أعاين ليك دموعي تسيل

أكُر في الحمدو عشرين مرّة

وأقرى معاها سورة الفيل

ولمن تمسكي المنديل وتمسحي بيو كحل عينيك

لمّي الدمعة فوقوا تسيل

أعاين في عيونك ديل

وأقول أريتني كان منديل

ما بنفع كلام يا ريت

نوعي ده ما شَبَه منديل

ملامحي قريبة للصارقيل!

كيفن بس أكون منديل

ولمّا تقومي منعدلة

وتقدلي ليك كم قدلة

أفنجط بي وراك ســــــــــــاي

التقول سخلة

أعاين وأقول هَمَلة

وحلاة القدلة في أهلها

حليوه وتمشي بي جَهلها

وتتقصّد مشي الأصلة

وأنا الفجغوني بي عَدلة

أنا اليادوب في دنيا الريد

مناي يا رب سلام في الإيد

عيونك زي عيون الصيد

كُبار زي خروف العيد

تكهربي بيها خلق الله

ونوعي ده عاد جنونو يزيد

وأقول يا رب تسلّم لي أو ساكت

تأشّر لي، وكان غمزت ده يوم العيد

وعينيك طالعا بينها طوّاف

لا الكبكابة لا الرجّاف

تقول رشّوني بي البفباف

يجيني رعاف

وأقعد ألف، عيوني ترِف

وأقول أكيد ده أثر فطور الفول

لمنّ تضحكي في نُكته

التقول لبعوني بي شنطة

وأكب فوق العصير شطّة

وأقرطع ما أسيب نُقطة

وأقول "يا سلام عصير لُقطة"

وإنتِ تقولي"بالغت وشربت الشطّة يا إنتَ"

مالها الشطّة، ما شربات عصير كُفته

عصير جركان من الدُكّان

يترشّه في صحن فتّة

ما مهم شرابي الشطة

والمهم الكلمة "بالغت "

و "شربت الشطّة يا إنتَ"

موضوع: سطلة مسطول الجمعة مايو 20, 2011 6:08 am

سطلة مسطول

دي الجرادة القاعدة بترضع في ولد الكديسة
صاحبة الديك والجدادة الحايمة بتكوس في المريسة
والضبانة الزغردت فرحانة بي جيت عريسها
والضب الخاتي سفة يشكي من الظروف العويصة
احييييييييييييييييييييييي انا

دا البمبر قال مصدع من قعاد طول النهار
و فردتو المفراكة تبكي وتشكي من طول الدوار
و الملاح حارقاهو شطة صاري قال ما عاوز هزار
والرغيف فقران وناشف من صف النتظار
و جكسويتي قالت انا ما بغازلها ركبت وش حمار
عاوزاني تحت البلوكنة ليل ونهار
على بالها روميو قالت سيد الرجال
ابيت زعلت تاني ركبت وش حمار
فكيتها الزيها راقدين كتار

تقولي لي سليتك
تقولي لي جفيتك
تقولي لي عفصتك
بعفصك وبعفص حنانك
دبايب وعقارب تداعب بنانك
بتسال عن حالك
وكيفن هو حالك
سالت تمرجي البطاطس بعادي
تجاهل وقبل لغادي
بحبك لمن بغادي
وبعاتبك بلغة سواقين التكاسي
حبيب مال انا ليش هذا عذاب
حبيب انت في كذاب
انت قول في حب واجد بعدين سوي غير نمونا
انت كنسل حب مالي
انت خرب كل حالي

شنو؟؟؟؟؟
ما عاجبك
ياخيييي ديشك
وديش الحب الخلاني سجينك
وديش الشوق البربط بيني وبينك

الوداعية

جلست في ظل النيمة

تتأمل في الودع المرصوص

قالت يا ولدي شيل شيلتك

وتسلح فالحرب ضروس

امامك مشوار طويل

الا ان تركب مخصوص

الموقف مكتظ مليان

ستدافر يا ولدي كثيرا

وستركب وسط النسوان

وستنشل كل نقودك

وستصبح دوما حزنان

الناس يا ولدي جيوش

مندفعة مثل الطوفان

فنصيحتي أن تذهب كداري

ولا تركب بص ام درمان

زواجك يا ولدي محال

أصبر يا ود الصًرة

حالياً وضعك بطال

وحتبقى حياتك مرة

فالمهر في كل الحلّال

قد اصبح بالعملات الحرة

احببت فتاة مغرورة

لعبت بي قلبك كورة

أنساها وأبحث عن غيرها

ويا ريت لو شرطت الصورة

أنسى وتبسّم

فالزوجة قسمة وتوتوكورة

الفووووووووووول

رهيب
يا حبيب الشعب يا انتاج بلادي
الله ما احلاك بالجبنة او بالزبادي
فيك سحر غير عادي
انت القدر والحبيب رهيب والله رهيب
في مناسباتنا العديدة
دائما مشكل حضور
في السمايات والمآتم
في العرس والطهور
يا الكل يوم معانا
في العشاء والفطور
عنك ما بنتخلى انت القسمة والنصيب
رهيب والله رهيب
نحنا البيك همنا
وانت سبب أذانا
في البيت والمطاعم
شايلين الصحانة
يا الساقينا موية
في الشتاء والسخانة
يا مسمار بطنا
يا أجمل حبيب
يا ود عم الفاليوم
وجودك مهم في البيت
وفي كل المحافل
أصبحت ذائع الصيت
الله ما أحلاك بالبصل والزيت
من ما ناكلك انت
نكوس العنقريب
رهيب والله رهيب
أصلي ولد بلدنا ما جابوك بالمطار
فيك فيتامين مغذي
زي السمك والخضار
وحاتك انت طاعم
لو بالملح والشمار
إن شاء الله تكون فطورنا
في الجنة ام همبريب
رهيب والله رهيب
يا النبتة العجيبة وصفك تعدى الخيال
بتقوم في أي حتة
في الرمال والجبال
وانت سبب هزائم
المريخ والهلال
ديل راقدين جنائز
ناقصم النحيب

الغربــــــــــــــــة

يا غربة يا غشاشـه يـا بكايـة يـا مستهبلـة
تغرينـا بدرهـم قـروش ولا قنـطـار بهـدلـه
جيناك بس نقصد سنه وحاجاتنا ناقصـه نكملـه
نبني البيوت في العاصمه نفـرش أثاثـه نجملـه
وكورلا حاره نرسله أصلو النقـل صـار مشكلـه
ونكمل الدين بي مهل والسمحه جاهـزه نحصلـه
غير القـروش اللاهـل عبـر الشهـور بنرسلـه
والباقي يدخل في البنوك ونشـوف دينـا نشغلـه
لكن حساباتنـا الغلـط فـي كـل عـام بنرحـل
مـرة سنـه مـن عمرنـا بنعدهـا ونفصـلـه
والحسبه وصلت طاشرات يمكن نعيـش ونعدلـه
لكن تعال نحاسبك يا وهم من غير رقم أو أمثلـه
كان للقروش نجري ونحوش لكن تقول بنشاكلـه
ما راضيه تقعد في الجيوب وتقول حرامي وبينشله
لكن بتقعد في الضهـور بديـون تقيلـه مقيلـه
كملانه ما بتقضي الغرض وأقـل حاجـه تكملـه
كملانه بي مطار وحق وزن ومجاملات مستعجلـه
ضرائب أبو عاج المشى وإلزامي حمـدي نحولـه
أحلامنا فيك صبحت سراب نمشي ونجر ما نحصله
زله ومهانه وإحتقـار خلـو النفـوس متململـه
سجن كبير فيـه الكفيـل سجـان قيـوده مكبلـه
وبقينا زي كيمان لحـم جـوه الهـدوم متكومـه
وأكيـد أكـل المعلـب والكندشـه ليهـم صلـه
مصران وقرحه وإكتئاب مرض القلب ووجع الكلى
لكن أريت هم القروش يا غربه فيك هو المشكلـه
سجن العيال جـوه الشقـق ولا فـراق العائلـه
جيب العيال بجيبنا مال وجيوبنـا غيـره مميلـه
تلقى الولد غالبوا الكـلام والبـت كبيـره مريلـه
كل المشاكل جاتهم سوا ما قدرنا أصلـوا نغيـره
لكن خلاص هان الخلاص عدك نزل مهمـا عـلا
يا غربه أدينـاك كتيـر أدينـا خاطـرك يسهلـه
خلينا نرجـع بالفضـل نلحـق حياتنـا نواصلـه
يا غربه يا غشاشـه يـا بكايـه يـا مستهبلـه

دائما سباق ورائع
تسلم يا كولا لك التحية
استمر دون توقف

» موسوعة الشعر السوداني
» ملف كامل لعلاج الشعر
» اكتب بيت شعر لنجمع اكبر عدد من بيوت الشعر السوداني
» علم الحاسوب وكييديا موسوعة الحاسوب